O CENSO EXTERIOR CHEGA A 335.000 PERSOAS QUE PODERAN VOTAR O 1-M SEN IDENTIFICARSE.(I)

(eleccionesgallegas2009.blogspot.com)

Moi interesante información leo no Xornal, na web de este periódico online está completo o artículo pero eu vou a poñelo por partes para que sexa máis doada a sua lectura.

A Coruña.- Supoñen xa un 12% do censo electoral galego e o seu peso non deixa de medrar. O número de emigrantes galegos e os seus descendentes, integrados no denominado Censo de Residentes Ausentes (CERA), increméntase mes a mes e, segundo os datos do Instituto Nacional de Estatística (INE), actualizados o pasado 1 de novembro, un mínimo de 334.087 persoas poderán participar nas eleccións do 1 de marzo sen pasar polas urnas e sen que o seu sufraxio estea sometido ao máis mínimo control de cara a garantir un voto libre e secreto. Á espera de coñecer o dato correspondente ao mes de decembro, que será utilizado como referencia para os comicios, os números mostran que, só nos últimos doce meses, algo máis de 9.000 novos nomes pasaron a figurar no CERA dalgunha das catro provincias galegas, un incremento que se sitúa nos case 30.000 novos inscritos se o punto de partida son as eleccións autonómicas de 2005, cando 305.017 residentes ausentes gozaron de dereito ao voto. Se ben as novas inscricións chegan cada mes, o gran salto produciuse en 1995, cando, en virtude dunha reforma da Lei Electoral, todos os españois residentes no exterior, con independencia de acreditar a súa identidade ou de estar vivos ou mortos, foron incluidos no censo. Así, se en 1996 un total de 149.424 podían acceder ao voto, apenas seis anos máis tarde, en 2002, a cifra case duplicara, ata situarse nos 275.400.